Artista e activista que pòrte damb era eth bateg d'ua val isolada.

S’introdusís ena musica des de ben petita. Possada per un fòrt besonh de comunicar, damb quinze ans comence a hèr es prumèrs passi ena composicion de cançons. Ei naturau trobar enes sòns tèxtes missatges compromesi, e enes sòns concèrts, ua atomsfèra generosa que convide a formar part en tot moment. Es espectacles d’Alidé son d’aqueri que non dèishen indiferent.

En 2012 ei descubèrta damb eth vidèoclip Esperança, projècte que denóncie era violéncia de genre. Tres ans dempús d’auer debutat damb eth disc Eth Paradís ei en tu (COMUNA XXI, 2015), era cantaira, acordeonista e guitarrista, publique eth sòn dusau LP Henerècla (Hètaman, 2018), tota ua revelacion musicau de ritmes mestissi e influéncies de musiques deth mon, cantada en occitan (aranés).

Alidé non sonque da supòrt a diuèrsi moviments sociaus, senon qu'ac hè en tot dar ua poderosa e commovedora votz a ua lengua en crisi.

Abituala ena scèna musicau occitana e catalana, a portat eth sòn son per França, Belgica, Alemanha, Luxemburg, Itàlia, Portugau e es Estats Units.

Ua votz e ua personalitat que despunten liures, coma er aire fresc que baishe dera montanha.